Mir hunn eng nei Säit!

Déi nächst Posten fannt dir op:

Lëtzebuergesch: www.WatDeBauerNetKennt.lu

oder op Englesch: www.wdbnk.com

Mir freeën eis Iech do zréck ze begéinen ! Bis direkt! ;-)

Alea iacta est! Et gëtt Dessert! Rubus cubus maximus! (vegan)

Schneekerei! Ei!

Haut hate mir frësch Hambieren am Haus, an do huet et geheescht: Alea iacta est! - Die Würfel sind gefallen. :-D  Duerfir e schnelle vegane Bisquit-Deeg gebak a mat enger Hambierglasur iwwerzunn.

Fir de Deeg brauch een:

• 225 g Miel
• 170 g Pudderzocker
• 1/2 Téiläffel Kurkuma
• 250 ml Spruddelwasser (richteg gutt spruddeleg!! kee medium)
• 5-6 Iessläffelen Ueleg (Raps- oder Sonneblumenueleg)
• 1 P. Reinweinstein
• 1 P. Vanillszocker
• 1 Pouz Salz

Schäffchen ob 180°C Ëmloft virhëtzen.
An enger grousser Schossel d’Miel, den Zocker, de Kurkuma, de Vanillszocker, d'Salz an de Reinweinstein gutt verréieren.

Dann den Ueleg ennerréieren an d’Spruddelwaasser lues ennermëschen dass d’Spruddelen nët zefill verfléien :-).

Eng véieréckeg Kucheform afetten, mat Miel ausklappen an den Deeg draginn.

Dat däerf lo 25-30 Minutte baken.

Et ass iwwregens derwäert sech eng véiereckeg Metallen Sprangform zouzeleen, duerch de Rand deen ee kann opdrécken, léisst de “Bisquit” sech ganz liicht eraushuelen. Den Deeg verhält sech komplett aanescht an enger Silikon Form a bäckt nët sou gutt duerch, an esou enger muss ee quasi 35-40 Minutte Bakzait arrechnen, an eventuell di läscht 10 Minutten ofdecken.

Mat engem Stäbchen testen, ob den Deeg duerch as. Duerno ob enger Hietchen ofkille loossen.

Fir den Hambierzockergoss:

• 125 g (+ e Grapp fir Deko) Hambieren
• 500 g Pudderzocker
• 1 Pak Kokosflacken

D’Hambieren ginn am Mörser reng gemätscht. Dora ginn 2 Iessläffelen kachend Waasser ageréiert, an ët gëtt 2 Minutte stoe geloss.

Da ginn d’Hambieren duerch eng Passette gedréckt, fir dass keng Käre matkommen.

Dëse Jus gët mam Pudderzocker verrouert, sou dass een décken Zockergoss entsteht.

De Kuch gett a Wierfele gedeelt, mat dem Zockergoss bestrach an an de Kokosflacke gewänzelt.
Drop kënnt nach e frëschen Hambier. Ommnommnomm ;-)

D'Saiert vum Hambier passt immens gutt bei d'Kokosnossflacken. Zéckt net! Et lount sech!

An 10 Minutte gekacht: Asiatesch Glasnuddel-Brennnesselszopp (vegan)

Haut ass nees Zait fir e bëssi Brennnesselgoodness… des Kéier mat Asia-Flair :-)

Fir dës lecker 10 Minutten-Zopp brauch een:

• 2 Liter Waasser
• 2 geheeften Iessläffelen Geméisbrittpolver
• e Pak Glasnuddelen
• 1 Fréijoersënn
• 1 Muert
• 1 Zitrounegras
• 1 kleng Saibecke Brennesselspëtzten
• Sojazooss a
• gehackte Nëss (z.B. Mandel, Afennëss…)

A lass:
D’Wasser gëtt mat dem Brittpolfer, dem Zitrounegras, der geschniddener Wuerzel, an dem klenggeschnippelten hellen Deel vun der Fréijoersënn opgesat.
Wann d’Britt kacht fléien d’Glasnuddelen an d’ Brennnesselspëtzen dran. Déi sinn an 3 Minutte fäerdeg.

Fir ze zervéieren kommen di geréischtert, gehackten Nëss, e Schotz Sojazooss, an de Rescht vun der Fréihjoersënn driwwer.

Dobäi passt natirlech och frësche Koriander :-)

Dat ass alles keng Affär, a séier geschitt. Vill Spaass beim Nokachen an e gudden Appetit!

Gänsefouss Geméis - E sou eppes Fäines! (vegan)

E ganz schnell gekachtend an immens leckert Geméis ass de Gänsefouss (Chenopodium/Melde).

Hei hu mir elo e Chenopodium Giganteum, eng extra Zort mat roude Blieder. Et ginn eng ganz Reih Zorten, déi all d'selwecht präparéieren kënne ginn wéi zum Beispill och de wäisse Gänsefouss, dee wiist op all (awer wierklech op all) Eck. De Chenopodium ass iwwregens d'Wëllplanz vum Mount Juni 2018 op eiser englescher Säit www.wdbnk.com ! An et ass och eng vun de 5 wëlle Geméiszorten déi an eisem neien eBook virgestallt ginn.

Ass irgendwou eng Plaz wou de Buedem broochläit, wou eng Baustell war, laanscht Weeër, oder am Gaart… quasi iwwerall wiisst e wann e gelooss gëtt ;-)

Gepléckt ginn déi iewescht Spëtzten, dann huet ee bis an de spéiden Hiescht eppes vum leckere, wëlle Geméis.


Hei dann d'Rezept fir d'Geméis:

Am Dëppen broden ech eng gehackten Zéif Knuewelék. Do dra flitt dann de gehacktene Gänsefouss. (Dat klengt onméiglech oder? :-) )
Gewierzt gëtt mat Salz, Peffer a Muskat. Am Mixer ginn e Grapp Cashewen mat engen Téiläffelche Geméisbrittpolver a 500 ml Waasser gemixt. Dat gëtt dann iwwert de Gänsefouss geschott.

2 Minutte brutschele gelooss, a fäerdeg. Ofgeschmaacht gëtt mat engem Sprëtzer Zitroun.

Mhhh lecker :-)

En aalt Geméis an engem neie Plat: Mangold-Curry (vegan)

Ech weess net wéi oft ech schons gefrot gi sinn wat ee mat Mangold ka maachen. Anscheinend ass en zimmlech onbekannt. Wann een da mol eppes héiert, dann ass et "et ass ewéi Spinat, oder?". Dobäi ass et éischter eppes wéi Routrommels-Geleef. Haut da mol e Rezept mat dësem gaaanz ale, leckere Geméis.

Fir dësen immens leckere Curry braucht dir:

• 1 Bond Mangold
• 1 Ënn
• 1 Zéif Knuewelék
• Kokosueleg
• 1 Grapp Cashewen
• 2 Läffele Currypolfer
• 1 Läffel Brittpolfer
• 1 Läffel Tomatemuerg
• e Grapp kleng Tomaten
• Salz a Peffer
• Zitrounegras
• Sonneblummekären
• 1 Zitroun

De Mangold gëtt kleng geschnëppelt a gëtt am Salzwaasser 3 Minutte blanchéiert.
An engem Dëppen gëtt d’Ënn an de Knuewelék am Kokosueleg ugedënst. Do dra flitt de Currypolfer, e Läffel Brittpolfer, d’Zitrounegras an e Läffel Tomatemuerg.

Dat Ganzt gëtt dann ofgelescht mat dem an 0,75l Waasser gemixtenen Cashewen. An d’Zooss kommen dann di kleng geschnëppelt Tomaten an de Mangold. Dat därf lo nach 2 Minutte brutschelen.

Ofschmachen mat Salz, Peffer an Zitroun an zervéieren matt geréischterten Sonneblummekären a Räis. E Gedicht. En alt Gedicht. E gutt Gedicht. :-)

Rübstiel? Stielmus? (Bal) egal! Lecker! (vegan)

Haut gëtt et een aalt Geméis: Rübstiel/Stielmus. Immens gesond, super lecker, quasi vergiess. Et brauch knapps 3 Woche fir ze wuessen, an ass domat e séiere Vitaminne-Liwwerant!

Fir 't éischt schneide mir Wuerzelen, Ënnen a frësche Knuewelék graff. Dat flitt an eng Pan mat Kokosueleg.

Dobäi kommen jeweils en Iessläffel

• Koriander
• Ingwer
• Chilli
• Hiefflacken
• Kurkuma
• Salz

an e bësse schwaarze Peffer.

Da kënnt de graff gehackte Stielmus derbäi a Sojazooss driwwer. Fir d'Séisst e gudde Strutz Agavendicksaft drop. De Stielmus zerfällt relativ séier. Et kann een des no an no an d'Pan ginn. Da kënnt den Deckel drop.

Am Waasser ginn d'Udon-Nuddele gekacht (3 Minutten). Déi Zäit an engem Dëppen ouni Fett e Grapp gehackte Mandele réischteren a fäerdeg ass d'Iessen!

Keng zing Minutten, an alles ass um Teller. Da so mol een frësch a gesond Kache wier opwänneg. ;-)

Hausmaacher vegan Sauerrahm

Vegan Sauerrahm!? Omnommnomm :-) Hausmaacher vegan Sauerrahm ass lecker op enger gebakener Gromper, oder op Gebootschtenen oder op Nuddele mat Tomatenzooss oder op der Schmier, oder op dem Fanger... :-D Sauerrahm eben. Omnommnommnomm!

Dir wëllt der och? Dat geet!Awer net vun Haut op Muer. Vun Haut op Iwwermuer, jo. Dat geet. An duerfir braucht Dir:
260 Gr. Cashewen
300 ml Waasser
1 Tiitchen probiotesch Kulturen
1/2 Zitroun
Eng Pauz Salz

D’Rezept ass ultra einfach; et muss een där Saach just eben 48 Stonnen Zäit ginn.

Mee wann een dann sou ee schéine Rythmus draus mecht huet een ëmmer super crèmegen, leckeren, gesontenen, tryptophangeluedenen, vegane Sauerrahm am Haus! Oh jo!

Also. 260 Gr. Cashewen gi mat kachendem Waasser iwwergoss, an eng Stëndche weeche gelooss. Da gi se ofgeschott, a mat 250 ml Waasser glat gemixt. Dodra gëtt eng Tiitchen probiotesch Kulturen aus dem Biobutték ageréiert. Dat Ganzt däerf dann 48 Stonne raschten.

Duerno kënnt e bëssi Salz, an de Jus vun 1/2 Zitroun dran. Zack Sauerrahm!

Fir op d’Gromper däerf dann nach eng zerdréckten Knuewelékszéif, Salz a Peffer, nach e bëssi Zitrounejus, eng Fréihjoersënn, Péiterséilech a Saueramper dran. Mmhhh...

Hat ech Recht? Ass dat einfach? Jo, gell? An Dir hutt et nach net geschmaacht! Duerfir: Ausprobéieren a mir Bescheed ginn wat Dir dovunner halt!

Kohlrabi-Carpaccio

Am Gaart ass de Kohlrabi zeideg, lo gëtt et lecker Carpaccio!
Dee schmaacht extra lecker mat engem Peffermënzpesto :-) Oh jo!

Fir dëst summerlecht a schnellt Rezept brauch een:

• 1 Kohlrabi
• en décke Grapp Peffermënz
• Sonneblummekären
• geraspelt Kokosnoss
• Salz
• Agavendicksaft
• Nossegen oder neutralen Ueleg (ech hat lo Sesam- an Hanf-Ueleg)
• e puer Brennesselspëtzten mat Bléien
• e sprëtzer Zitrounejus
• an Chiliflacken

De Kohlrabi gëtt an dënn Scheiwe geschnidden, a vu baussen no bannen esou drppéiert, dass et dem Här Fibonacci Freed géing maachen :-)

D’Sonneblummekären an d’Kokosraspelen gi geréischtert, a mat engem Grapp Peffermënz, engem gudde Schotz Ueleg, enger Strutz Agavendicksaft an enger Pauz Salz gemixt.

An e bëssi Kokosueleg gin di gesond Brennnesselspëtzten 1 Minutt gebroden datt se nët méi picken.
Da gëtt ugeriicht. Iwwert de Plat, kënnt nach eng Strutz Agavendicksaft, a fir d’Saiert nach e bëssi Zitrounejus.
Wien et gäer e bëssi schaarf huet, ka sech nach e puer Chiliflacken driwwer streeën.

Nom Uriichte gëtt direkt zervéiert.

E gudden Appetit :-)

Rousegebees (vegan)

E Rousegebees ass eppes Leckeres op der Schmier awer och fir bei Desserten.

Fir d’Rousegebees ginn d’Bléien déi mer gebraucht hu fir de Sirup ze kachen, zesumme mat zwou Louchen Sirup, an engem Pak Kal-Geléiermëttel (ze fannen am Biobutték) 4 Minutte gemixt.
Wann een e Mixer huet ouni Messeren ass dat super, da bleiwen d’Bléieblieder ganz, an dat huet schon eppes, wann een déi nach erkennt. :-)

Mech huet bei deem ganze Rousendoft d'Muse gebass. Hei en Abléck a meng Gedanke beim Mixen:

An d’Hierz de Wand den Doft dir dréit,
wann d’Blumm vun de Rousen faarweg bléit.
De Schmierz vun der Welt, gëtt da vergiess,
An d’Schmier mam Gebees zackzack och giess… hehe :-)

Rousenesseg a Rousesirup (vegan)

Mir woren op Besuch an der Stad an do stoung eng wonnerbar Doftrous: 3 Meter héich, 4 Meter breet a voller immens gutt richende Bléien! Do musst einfach profitéiert ginn!

Mat frëndlecher Erlabnis hu mir 1 Schossel voll gepléckt, an et wor wéi wann näischt fort wier… immens ! :-)

Dorausser goufen 3 Saache präparéiert.

Hei mol déi éischt zwou:

Wichteg: D’Blieder sollen nët gewäsch gin, soss ass de Goût flöten :-)

Esseg:
Eng Fläsch gëtt locker zu 3/4 mat Rousebléieblieder gefëllt. Driwwer kënnt en Äppelesseg. Dat Ganzt därf dann 4-5 Deeg zéien, a fäerdeg

:-D den Esseg schmaacht einfach super an de Vinaigretten!

Sirup:
1L Waasser mat 1 Kg Zocker 10 Minutte kache loossen. Da gëtt d’Plack ausgemaach. Elo de Jus vun 2 Zitrounen, an eng Schossel voll Rousebléieblieder dra gin. Ofkille loossen, a fäerdeg.

Huelt elo eng Passette a schëtt alles derduerch. A Fläsche verschléissen an de Summer genéissen! :-D

Äerdbiers-Brennessel Glace mat Kokosmëllech (vegan)

  

Et ass Zäit fir e leckeren Dessert! Séissschniewelcher opgepasst :-)

Wien sech dësen Dessert wëll selwer maachen, dee brauch:

• 1 Schossel Äerdbieren
• 1 kleng Saibecken Brennnesselspëtzten
• Kokosueleg
• Salz
• Ahornsirup
• 1/2 Zitroun
• 2 Dousen Kokosmëllech
• evtl. Kokosraspelen

D’Äerdbieren gi fir d’Séisst erauszelackelen kuerz mat e bëssi Kokosueleg an engem Dëppen opgekacht bis de Jus aus den Äerdbiere kënnt. Dat sinn esou +- 3-4 Minutten. Dobäi kënnt en décke Schotz Ahornsirup, an de Jus vun 1/2 Zitroun.

An de Mixer fléien 2 Dousen Kokosmellech, eng Pauz Salz, an d’Äerdbieren aus dem Dëppen. Déi gi just kuerz gemixt, sou dass nach e puer Stéckelcher erkennbar bleiwen. 4/5 dovun fléien elo direkt an d’Glacemaschinn. De Rescht gëtt mat de réie Brennnesselspëtzten reng gemixt an dobäi ginn.

D’Glacemaschinn brauch lo 15-20 Minutten fir dat ze killen :-)

Fir ze zervéieren kann een e puer geréischtert Kokosraspel an Äerdbieren driwwer ginn.
(Mäin an de Som kommende Kierwel wor och ganz lecker dropp :-) )

Wie keng Glacemaschinn huet, kann dat Ganzt iwwernuecht afréieren, an 30 Minute virum Zervéieren aus dem Tiefkühler huelen. Eventuell kann dat dann nach eemol an de Mixer. Ech muss ower soen dass dat nie op daat selwecht eraus kënnt wéi wann een et an der Maschinn dréine léisst.
Ech hun nach esou eng gutt al Glacemaschinn déi ech virun 20 Joer vu menger Boma geschenkt krut. Déi war och scho virdrunn bei hir am Asatz, a geet nach ëmmer 1A  :-) #fréierwarallesbesser #plannedobsolescence

Päckelcher aus dausend an enger Nuecht - Buedemhielänner Fatayer (vegan)

De Buedemhielänner kann een oft sammelen, well e séier nowiist an een es net midd gëtt en ze iessen. ;-) En ass esou gutt réi oder gekacht, datt ee vill verschidde Rezepter domat kann ëmsetzen, ouni datt et eng Kéier géing d'selwecht schmaachen.

Hei hu mer eis e Plat aus dem Mëttleren Oste virgeknäppt an hunn a mat eisem lokale Wëllgeméis an natierlech ganz vegan ëmgesat.

Fir den Deeg:
250 g Miel
1 ILäffel Zocker oder 1 klenge Cube Jaggery
1 Pak Drëschenhief
1 IL Salz
3 IL Olivenueleg

D’Fëllung gëtt net gekacht, mee einfach frësch gemixt.

1 Schossel voll Giersch, oder soss Wëllkraider… hei koum nach e bëssi Hanfnessel an Bärlauch dran.
1 Ënn
1 Zéiw Knuewelék
E Grapp Berberitzen
E Grapp Peffermënzblieder
Salz
e Grapp geréischtert Sonneblummekären
an 2 IL Olivenueleg

Deeg:
D’Hief gëtt mam Zocker an 250 ml Wasser opgeléist. An matt deenen aneren Zoutaten zu engem net pëschegen Deeg verknied. Deen däerf dann 30 Minutte leie bleiwen.

Fëllung:
D’Kraider fir d’Fëllung gi mat 1 Ënn, de Berberitzen an dem Knuewlék am Mixer kleng gehackt, a mat dem Rescht vermëscht.

Den Deeg gëtt dënn ausgerullt, a mat enger décker Tas ronn ausgestach. An d’Mëtt kënnt 1 TL Fëllung, de Rand gëtt mat de Fanger befiicht, an zu engem Dräieck zezummegedréckt.

D’Täschelcher gi bei 200 Grad am Uewen 10-15 Minutte gebak.

 Verschidde Leit gesinn Onkraut. Mir gesinn e Koup gratis Iessen a Vitaminnen! ;-) Sou gesäit et aus wann ee Giersch (Buedemhielänner) fonnt huet.

Dem Gudden Heng säi Risotto

De Gudden Heng (Guter Heinrich) wiisst gäer op deene selwechte Plaatzen ewéi d’Brennnessel.  Ze erkennen ass hie ganz liicht un der Form vu senge Blieder déi geformt sinn ewéi eng Speerspétzt an ënnendrënner liicht bemielt sinn.

D’Blieder ginn ewéi Spinat benotzt oder se gi sauer agemaach. Déi jonk Schëss kënne wéi Spargele gekacht ginn. Vun do kënnt säin aneren Numm "Aarme Leits Spargel”.

De Som gëtt ewéi Quinoa am Waasser gekacht... Jepp, genau! E weidere regionale, wëllen Quinoa, nieft dem Amaranth. ;-D

Déi sin all aus der selwechter Famill :-) De Gudden Heng schmacht e bëssi no Spinat, awer vill méi intensiv - definitiv ee super Wëllgeméis!!

Fir de Risotto ginn 3 Zéiwe Knuewelék an 1 Schalott gehackt an zesumme mat 250 Gr Risotto-Räis am Olivenueleg ugedënst.

Den Gudden Heng gëtt kleng geschnëppelt a kënnt zesumme mat enger Tomat an de Räis. Fir no an no opzefëllen gëtt 1 Liter waarem Geméisbritt geholl. 1 Iessläffel Hiefflacken ginn dem Plat de gewënschtene, kéisesche Goût.

Wann di ganz Britt opgebraucht ass, mat Peffer ofschmachen an eventuell Salz - dat hängt vun der Geméisbritt of déi benotzt gëtt.

Am léifsten hunn ech, wann de Räis nach e bëssi Bëss huet. Mee dat maacht Di wéi Dir wëllt. Driwwer ginn nach e puer geréichtert Sonneblummekäre gestreet, frësche Basilikum an Chilli.

E gudden Appetit! :-D

Sinn déi weltbescht Eisekuche vegan? Probéiert et aus! :-D

Dir sitt Veganer, an Dir hat schonns laang keng Eisekuche méi giess? Dir hutt mat "vegan" näischt um Hutt, an Dir mengt den Titel hei wier just een Teaser fir Iech dozou ze bréngen drop ze klicken? Dann hu mir elo eng Iwwerraschung: Dat hei si wierklech déi beschte Eisekuche vun der Welt! A jo: se si vegan!

Am Video: Mir hate Besuch vum Gilles vun www.calme.lu. 
Him villmols Merci fir d'Entspaanung ;-) an d'Hëllef beim Kachen!

A se sinn och iwwerhaapt net schwéier ze maachen:

• 400 g Miel an
• 800ml Waasser gi matt 
• enger Tas Cashewen
• enger Pouz Salz
• engem Pak Reinweinstein
• enger décker Strutz Agavendicksaft
• engem Iessläffel Kokosnossueleg
• a Vanille gemixt. 

Dat Ganzt gëtt en zimmlech flëssegen Deeg. Loosst deen dann 20 Minutte stoën.

D'Eise gutt virhëtzen a ra mam Deeg!

D’Eisekuche gi bausse super knusprech an bannendra mëll.

Si schmache lecker drëchen oder mat frëschem Uebst an Ahornsirup.

Hei hate mir e Rhubarbs-Sugo dobäi. Duerfir de Rhubarb schielen, schneiden, a mat e bëssen Agavendicksaft, Waasser a Vanill mëll kachen. Dat geet ganz séier. Lecker!

Eng Ofkillung? E séieren Dräiblat-Cooler! :-D

Fir en Dräiblat-Cooler einfach e Grapp Dräiblat (Buedemhielänner/Giersch) mat enger Strutz Agavendicksaft an 1,5 Liter Wasser am Highspeed-Blender mixen. De gudde Goût vum Dräiblat wäert Iech neess séier zum Mixe beweegen. Sou e Liter an en halwen ass jo och net esooouu vill... ;-) Besonnesch bei esou warmen Deeg ewéi haut déi Alternativ zu soss séissen Optiounen!

D'Dräiblat (Buedemhielänner/Giersch) fënnt een op schietegen Plazen. Besonneg um Rand vu Bëscher oder hannert Hecken.

De Geroch an de Goût erënneren un eng Mëschung aus Wuerzelen a Péiterséilech. Giersch wiisst immens gutt, a war iwwer Jorhonnerte beléift well et dat éischt Geméis am Joer war, wat d'Leit mat Vitaminne versuergt huet.

De Buedemhielänner huet vill Kalzium, Kalium, Koffer, Zénk, Mangan, Magnesium a Flavonoiden. Zudeems huet e 4 mol méi Vitamin C wéi Zitrounen, vill Vitamin A an Eewäiss.

An net ze vergiessen: E schmaacht immens gutt - a kascht näischt. ;-)

Defteg ewéi och séiss eng Delikatess!

Hei nach en anert Rezept mat dësem immense Geméis:

Dem Plato seng léifste Fajitas

Wisebäreklau-Minestrone (vegan)

En Teller voll Proteinen a Calcium!

D'Wisebäreklau ass do! :-D E gudde Moment fir déi jonk Blieder ze sammelen an ze notzen. Dës Pastinakeplanz waart an de Wisen op Iech a verwinnt Iech mat sengem feine Goût a gesonden Inhaltstoffer.

Am Osten ass d'Wisebäreklau een Haaptbestanddeel vum Borschtsch, also däer leckerer Routrommelszopp. Mir maachen se haut an e Klassiker aus dem Süden: an d'Minestrone! :-D

Duerfir: Schung un, Händschen un an eng Seibecke voll Wisebäreklau fänke goen. 

Fir d'Minestrone braucht Dir eng bont Mëschung Bounen, Lënsen, Ierbessen a Kar (déi kritt Dir och fäerdeg gemëscht ze kafen). Déi musst Dir natierlech den Dag virdrun aweechen, duerfir net ze kuerzfristeg plangen. ;-) Maacht beim Aweechen e Läffel Natron an d'Wasser, da gi se méi séier mëll. Och an d'Kachwaasser kënnt ee Läffel Natron, da si se immens séier duerch (knapps 30 Minutten... ëmmer nees dru schmaache fir de Moment net ze verpassen ;-) ).

Wat een alles fir d'Zopp brauch ass:

• 2 Gromperen
• 1 Ënn
• 2 Zéiwe Knuewelek 
• 2 Muerten
• 1 Liebstöckel
• 1 Tomate pelée
• 1 Lorberblad
• 2 Neelcheskäpp
• Geméisbrittpolver
• Salz a Peffer

Dir loosst also Är Boune kachen. An där Zäit gëtt alles vu Geméis (och d’Wisebäreklau) kleng geschnidden an an engem Dëppen mat e bëssen Olivenueleg ugedënst. Wa se duerch sinn, kommen d’Bounen dobäi an dat Ganzt gëtt mat der Dous Tomate pelée an 3 Douse Waasser opgefëllt. Huelt heifir einfach d'Dous vun der Tomate pelée als Miessbecher. ;-) De Rescht vun den Zoutate bäiginn, réieren, an nach op d'Mannst 30 Minutte kächele loossen.

Gitt heiansto dru richen. Da kritt der Zäit gutt rëm, an dir gitt ëmmer méi hongreg. :-)

Dra passt och nach frësche Basilikum a fir de Crunch liicht ugeréichtert Wëllkar.

E Gedicht déi Minestrone! A consommer sans modération, wéi se a Frankräich soen.

Dem Plato seng léiwste Fajitas ;-)

Dat vun der Antike bis nom Mëttelalter vill benotztend Fréijoersgeméis erkennt ee ganz gutt u senge Blieder déi ëmmer zu dräi beieneen wuessen: si sinn hellgreng a liicht behoert. "Wa Fajitas, da just mat Buedemhielenner", sot schonns den agefleeschte Vegetarier Plato, a mir si senger Meenung! ;-)

De Buedemhielänner (Giersch) fënnt een op schietegen Plazen. Besonneg um Rand vu Bëscher oder hannert Hecken.

De Geroch an de Goût erënneren un eng Mëschung aus Wuerzelen a Péiterséilech. Giersch wiisst immens gutt, a war iwwer Jorhonnerte beléift well et dat éischt Geméis am Joer war, wat d'Leit mat Vitaminne versuergt huet.

De Buedemhielänner huet vill Kalzium, Kalium, Koffer, Zénk, Mangan, Magnesium a Flavonoiden. Zudeems huet e 4 mol méi Vitamin C wéi Zitrounen, vill Vitamin A an Eewäiss.

An net ze vergiessen: E schmaacht immens gutt - a kascht näischt. ;-)

Fir d’Fajitas, gin d’Tortillas an e fiischt Duch geweckelt, an am Uewen op 50 Grad gewiermt.

An der Pan gebrode gin
1 Enn
2 Zéiwe Knuewlék
1 Paprika
1 Saibecke voll Buedemhielänner (Giersch)
1 déck Tomate

offgeschmacht get matt
Salz, Peffer a Kreuzkümmel.

5 Minute kächele loossen.

Fir d’ Guaccamole gin,

2 Avocadoen
1 zéif Knuewlék
De Jus vun 1 Zitroun
1/4 Glas Waasser
Peffer, Salz a Kreuzkümmel
gemixt.

Di zwou Saachen gin an der Mëtt vun dem Tortilla verdeelt an zesummegerullt.

De räscht Guaccamole gëtt niewendrunn zervéiert.

Réiderchersgréngs Pide

Wat de Bauer net kennt on Tour :-)

Mir sinn ënnerwee am Parc naturel des Baronnies Provencales, an hu bei eisem Gîte e Pizza-Uewen. Dee gehéiert probéiert! ;-) Wann Dir gäeren am schéine Gîte du Cladan reservéiere wëllt a 15,-€ spuere wëllt, da klickt op dëse Link.
An dee Pizza-Uewe koum eng (net ganz) tierkesch Pide :-) an zwar mat Réiderchersgréngs!

Natierlech klappt dat och ganz gutt an engem normale Schäffchen; einfach op de Maximum Virheizen, mat Ënnerhëtzt a mat Ëmloft, an dann d’Pide direkt um Buedem vum Schäffchen 6 Minutte baken.

Den Deeg hu mer ähnlech dem Pizzadeeg gemaach (just keng Schmull dran):

• 360 ml wotlecht Waasser
• 2 El réien Zocker
• 1 Pak Drëchenhief
• Miel
• Téimermännchen (Thymian)
• 1 El Salz
• e Schotz Olivenueleg.

Dee muss dann eng Stonn stoen. 

Du sollte mir den Uewen mat Holz op 280 Grad virheizen… dorausser sinn 3 Stonne ginn! LOL :-) (Neen, ech wëll doheem kee Pizzauewen… nee nee :-) )

Fir d’Fëllung koum an eng Pan:

• eng graff geschnidden Ënn, 
• d’Gréngs vun de Réidercher, 
• eng graff geschniddene Paprika 
• eng Tomat, 
• Peffer a Salz. 

Dat Ganzt gëtt just ganz kuerz gebroden bis d’Gréngs zesummegefall ass. (D’Fëllung schmaacht och als “Ragout” bei Gromperen oder Räis ganz lecker!)

Den Deeg gëtt a 5 gedeelt an oval ausgerullt. Da kënnt Fellung drop an de Bord zu engem Schëffelchen eropgefaalt. An da gëtt gebak.

Ech muss zouginn dass d’Holzfeier awer schon en immense Goût ofgëtt, trotzdem war mir dat e bëssi ze ëmständlech...Feier maachen, waarden, noleeën, Temperatur kontrolléieren, noleeën, oppassen dass d’Feier och schéi mëtteg brennt, Temperatur kontrolléieren, waarden… No 3 Stonne d'Glous op d’Säit, propper kieren, a lass :-) 1 ten Duerchlaf baken, Temperatur kontrolléieren, Feier neess mëtteg leeën a bei Besoin neit Holz drop, waarden, op d’Säit mam Holz, propperkieren, an op en Neits :-) Hihi, Slow Food 3000. Mee dann ass een och wéinstens richteg hongreg. ;-)

Avocado-Basilikum Pesto mat Veronika (Persischer Ehrenpreis)

Mhh... Avocado;-)

Fir de Pesto gin dräi zeideg Avocadoen zesumme mat

2 Knuewlékszéiwen, dem Jus vun
1 Zitroun,
1 Grapp Basilikum,
Peffer, Salz an engem halwen Téiläffel gemuelenem Kreuzkümmel,
1/2 Glas Waasser an engem e gudde Schotz Olivenueleg
gemixt bis et crèmeg as.

Dat kënnt op gekachten Nuddelen.
Ech sinn dann och ëmmer frou wa bei sou eppes och e bësse Crunch dobäi ass, also gouf e séieren Tempering gemaach matt:

Moschterkären
Hanfsom an
Chilli, am Olivenueleg ugebroden.

D' Veronikabléien mëcht de Plat schéi faarwech, an nach méi gesond. ;-)

D'Veronika fannt Dir a Wisen. Si wuessen ëmmer an engem ganze Grupp, well si sech duerch Rhizomer ausbreeden. Méi bekannt ass natierlech den Téi deen een dorausser ka preparéieren, mee esou iwwert e Plat gestreet, ass sie besonneg an der Bléi immens wëllkomm. Fréier gouf d'Planz och nach Allerweltsheil genannt, well hir sou vill heelend Wierkungen zougeschwat gi sinn. Allgemeng kann ee soën, datt d'Planz eng Immun stäerkend Wierkung huet an géint d'Fréijorsmiddegkeet hëlleft.

Kierwel Paangescher - Oublies farcies (vegan)

E mëttelalterlecht Rezept, vegan ofgewandelt.

Fir de Paangesch Deeg hunn ech 50 Gr. Séisslupinnemiel, 250 Gr. Vollkornspelzmiel, 2 Läffelen Läinsom, 400 Ml Räisdrink, Waasser fir déi richteg Konsistenz, Salz an e bëssi Currypolver (deen ass nët Mëttelalterlech :-) ) vermëscht, an 15 Minutte stoe gelooss.

De Kierwel an zwou Knuewlékszéiwen goufe gehackt. En klengen Deel vum Kierwel koum an den Deeg.
An enger Pan mat e bëssi Ueleg gouf de Knuewlék ugebroden an dora koum kuerz de Kierwel.
Ofgeschmaacht gëtt mat Salz an Chilli an/oder Peffer.

D’Paangescher goufen vun zwou Säite gebroden, a vum Kierwel jeweils just 2 Tl Fëllung de laange Wee duerch d' Mett verstrach an zesummegerullt.

Dobäi schmaacht eng kleng Zalot. :-)